Irani dhe Shtetet e Bashkuara kanë dallime të mëdha mbi mënyrën e lehtësimit të sanksioneve në negociatat për programin bërthamor të Teheranit, tha një zyrtar i lartë iranian për Reuters, duke paralajmëruar se pavarësisht bisedimeve të reja të planifikuara për fillim marsi, tensionet mbeten të larta.

Negociatat u rifilluan në fillim të këtij muaji mes Irani dhe Shtetet e Bashkuara për t’i dhënë zgjidhje mosmarrëveshjes shumëvjeçare mbi programin bërthamor iranian, ndërkohë që SHBA po rrisin praninë ushtarake në Lindjen e Mesme, duke shtuar frikën për një përshkallëzim të mundshëm. Teherani ka paralajmëruar se do të sulmojë bazat amerikane në rajon nëse goditet.

Sipas zyrtarit, raundi i fundit tregoi se palët kanë qasje të ndryshme për fushëveprimin dhe mekanizmin e heqjes së sanksioneve, ndërsa kërkohet një afat kohor “logjik dhe i arsyeshëm” i bazuar në interesa të ndërsjella. Ministri i Jashtëm iranian, Abbas Araqchi, deklaroi se një kundërpropozim mund të jetë gati brenda pak ditësh, ndërsa presidenti amerikan Donald Trump ka thënë se po shqyrton opsione për sulme të kufizuara ushtarake.

Një pikë kyçe mosmarrëveshjeje mbetet kërkesa amerikane për “zero pasurim” uraniumi, të cilën Irani e refuzon. Uashingtoni e sheh pasurimin si rrugë të mundshme drejt armëve bërthamore, ndërsa Teherani këmbëngul se programi i tij është paqësor dhe kërkon njohjen e të drejtës për pasurim. Sipas Agjencisë Ndërkombëtare për Energjinë Atomike, rezervat iraniane të uraniumit të pasuruar shumë tejkalojnë 440 kg me pastërti deri në 60%, afër nivelit 90% që konsiderohet gradë për armë.

Zyrtari tha se Irani mund të shqyrtojë kompromis, përfshirë eksportimin e një pjese të rezervave, uljen e nivelit të pasurimit dhe krijimin e një konsorciumi rajonal, në këmbim të njohjes së të drejtës për pasurim bërthamor paqësor. Ai shtoi se ekziston mundësia e një marrëveshjeje të përkohshme.

Teherani argumenton se një zgjidhje diplomatike do të sillte përfitime ekonomike për të dy palët, duke përfshirë mundësi investimesh amerikane në industrinë e naftës iraniane. Megjithatë, zyrtari theksoi se vendi nuk do të heqë dorë nga kontrolli i burimeve të tij natyrore dhe se kompanitë amerikane mund të marrin pjesë vetëm si kontraktorë.