Shtetet e Bashkuara kanë nisur një operacion të ri ushtarak në Siri me objektiv goditjen e strukturave të ISIS-it. Lajmi u bë i ditur të premten nga Sekretari amerikan i Mbrojtjes, Pete Hegseth, i cili tha se operacioni synon eliminimin e luftëtarëve të ISIS-it, infrastrukturës dhe objekteve të armatimit të tyre.
Sipas zyrtarëve amerikanë, ndërhyrja vjen si reagim pas vrasjes së tre shtetasve amerikanë në një sulm pritë të ndodhur rreth një javë më parë. Operacioni është përshkruar si një “goditje në shkallë të gjerë”, e fokusuar në disa zona të Sirisë qendrore, ku ISIS dyshohet se ka pasur baza dhe depo armësh. Burime të tjera kanë bërë me dije se priten edhe veprime të mëtejshme.
Në operacion janë përdorur avionë luftarakë F-15 Eagle, helikopterë Apache, avionë F-16 nga Jordania, si edhe sistemi raketor HIMARS. Në një deklaratë publike, Hegseth theksoi se veprimi nuk përbën fillimin e një lufte të re, por një akt hakmarrjeje për sulmet ndaj qytetarëve amerikanë.
Presidenti Donald Trump kishte paralajmëruar më herët një reagim të ashpër, duke fajësuar ISIS-in për sulmin e 13 dhjetorit në shkretëtirën siriane, ku humbën jetën dy pjesëtarë të Gardës Kombëtare të Ajovës dhe një përkthyes civil amerikan. Ata ishin pjesë e forcave amerikane të dislokuara në Sirinë lindore në kuadër të koalicionit kundër ISIS-it.
Ndërkohë, televizioni shtetëror sirian raportoi se goditjet kanë përfshirë zona rurale në provincat Deir ez-Zor dhe Raqqa, si edhe rajonin Jabal al-Amour pranë Palmyrës, ku janë shënjestruar depo armësh dhe objekte të përdorura nga ISIS për aktivitetet e tij në rajon.