Një person vritet nga raketa në Dubai/ Britania e Madhe do të nisë fluturimet me çarter për shtetasit britanikë që ndodhen atje

Qeveria e Mbretërisë së Bashkuar do të organizojë fluturime me charter nga Dubai në fillim të javës së ardhshme për shtetasit britanikë që dëshirojnë të largohen nga rajoni, duke u bazuar në situatën aktuale në terren.

Charteri që do të niset nga Emiratet e Bashkuara Arabe, do të jetë i disponueshëm me pagesë.

Konflikti në rajon ka vazhduar, ndërsa Emiratet e Bashkuara Arabe dhe Katari raportuan sulme me raketa dhe dronë të shtunën. Dy fluturime të tjera me charter nga qeveria deri tani kanë rikthyer shtetas britanikë nga Muscat-i i Omanit. Fluturimi i parë mbërriti në aeroportin Stansted të premten, ndërsa i dyti në aeroportin Gatwick të shtunën. Një fluturim i tretë do të niset nga Muscat të dielën.

Ministria e Jashtme britanike njoftoi se fluturimi nga Dubai do të shtohet mbi linjat komerciale që funksionojnë nga Emiratet e Bashkuara Arabe dhe do të niset në fillim të javës së ardhshme. Qeveria thekson se të gjithë pasagjerët duhet të kenë dokumente të vlefshme udhëtimi, ndërsa personat jo-britanikë që udhëtojnë së bashku do të kenë nevojë për vizë ose leje që të hyjnë ose qëndrimin mbi gjashtë muaj.

Ministria e Jashtme do të kontaktojë drejtpërdrejt individët për t’u dhënë biletën dhe do të japë përparësi atyre që janë në rrezik, si personat me nevoja urgjente mjekësore. Më shumë se 160,000 persona kanë regjistruar praninë e tyre në rajon me Ministrinë e Jashtme.

Fluturimet nga Dubai, një nga aeroportet më të ngarkuara në botë, janë ndikuar rëndë që nga fillimi i sulmeve të hakmarrjes nga Irani ndaj vendeve të Gjirit si reagim ndaj ofensivës së SHBA-së dhe Izraelit. Javën e kaluar, kompania Emirates pezulloi përkohësisht të gjitha fluturimet nga Dubai, një destinacion i preferuar turistik për shtetasit britanikë.

Të shtunën, pamje të verifikuara nga BBC treguan atë që duket të jetë një dron duke goditur brenda perimetrit të Aeroportit Ndërkombëtar të Dubai-t. Pamjet, të filmuara nga një zonë industriale në jug të aeroportit, kapën një shpërthim pranë një ndërtese terminali. Qeveria e Emirateve të Bashkuara Arabe nuk ka komentuar mbi incidentin, por autoritetet konfirmuan se një person ka vdekur, i goditur nga rrënojat e një rakete të interceptuar, sipas raportimeve të agjencisë AFP.

Top Channel