Një burrë nga Rajasthan, Indi, ka habitur mjekët dhe botën me një rast të jashtëzakonshëm; ai fle deri në 300 ditë në vit për shkak të një çrregullimi të rrallë neurologjik, të quajtur “Axis Hypersomnia”. Purkharam, 42 vjeç, po përballet me këtë gjendje të pazakontë prej më shumë se dy dekadash. Kur bie në gjumë, është pothuajse e pamundur të zgjohet. Familja e tij kujdeset plotësisht për të; e ushqen, e lan dhe madje e ndihmon edhe për nevojat personale, ndërkohë që ai mbetet në gjumë.
Ai arrin të hapë dyqanin e tij të vogël ushqimor vetëm rreth pesë ditë çdo muaj dhe pjesën tjetër të kohës e kalon në gjumë të thellë. Edhe pse shpesh fle nga 20 deri në 25 ditë pa ndërprerje, ai zgjohet përsëri i lodhur, duke vuajtur nga dhimbje të forta koke dhe mungesë energjie. Me kalimin e viteve, gjendja e tij është përkeqësuar, por familja vazhdon të mbajë shpresën se një ditë Purkharam do të mund të ketë një jetë normale.
Sipas Institutit Kombëtar për Çrregullimet Neurologjike dhe Goditjet në Tru (NINDS), hipersomnia është një çrregullim që shkakton përgjumje të vazhdueshme dhe të thellë, e cila nuk zhduket as pas shumë orësh gjumë, duke e bërë pothuajse të pamundur për personin e prekur të qëndrojë zgjuar ose i përqendruar gjatë ditës.