Zëdhënësi i Kremlinit, Dmitry Peskov ka bërë një deklaratë të fortë ditën e sotme, teksa tha se NATO është në luftë me Rusinë.
Deklarata e tij erdhi si një përgjigje ndaj qëndrimeve të kohëve të fundit nga Ministri i Jashtëm polak, Radoslaw Sikorski, i cili kishte deklaruar se NATO nuk është në luftë me Rusinë.
“NATO është në luftë me Rusinë. Është e qartë dhe nuk ka nevojë për ndonjë konfirmim shtesë. NATO po merr pjesë de facto në këtë luftë,”– tha Peskov në një konferencë për shtyp.
Më herët gjatë ditës së sotme, Kremlini njoftoi se sekuestrimi i aseteve ruse të “ngrira” nga shtetet evropiane do të godiste sistemin financiar perëndimor, ndërsa paralajmëroi se Moska do të ndërmerrte veprime kundër çdo vendi që do të përpiqej të sekuestronte asetet e tij.
Sipas Reuters, Presidentja e Komisionit Evropian Ursula von der Leyen dëshiron që Bashkimi Evropian të gjejë një mënyrë të re për të financuar mbrojtjen e Ukrainës kundër Rusisë, duke përdorur interesat nga asetet ruse të ngrira në Evropë.
Në një zhvillim të lidhur me këtë, Politico raportoi gjithashtu se Komisioni Evropian po shqyrton idenë e përdorimit të depozitave ruse në para të gatshme në Bankën Qendrore Evropiane nga obligacionet ruse në skadim për të kërkuar një “Kredi Dëmshpërblimi” për Ukrainën.
“Nëse kjo ndodh, Rusia do të veprojë kundër shteteve të BE-së dhe mashtruesve evropianë nga Brukseli dhe vendeve individuale të BE-së që po përpiqen të na sekuestrojnë pronën, deri në fund të shekullit“, shkroi ish-Presidenti rus Dmitry Medvedev në Telegram.
Rusia do të veprojë kundër vendeve evropiane në të gjitha mënyrat e mundshme dhe në të gjitha gjykatat e mundshme ndërkombëtare dhe kombëtare, si dhe jashtëgjyqësore, tha Medvedev, i cili aktualisht është nënkryetar i Këshillit të Sigurisë Ruse.
