Presidenti ukrainas Volodymyr Zelensky ka reaguar ashpër ndaj vazhdimit të sulmeve ruse, pavarësisht deklaratave nga Moska për një armëpushim me rastin e Pashkëve. Ai theksoi se propozimi për një pauzë 30-ditore pa kushte është injoruar nga Rusia për 39 ditë me radhë, edhe pse është mbështetur nga Shtetet e Bashkuara dhe pranuar nga Ukraina.
“Nëse Rusia është vërtet gati për një armëpushim të sinqertë, atëherë Ukraina do të reflektojë sipas veprimeve të saj. Heshtje për heshtje, mbrojtje për çdo sulm,” u shpreh ai.
Zelensky shtoi se Ukraina është e gatshme të zgjerojë një armëpushim përtej ditës së Pashkëve më 20 prill, si një mënyrë për të zbuluar synimet reale të Kremlinit. Megjithatë, ai theksoi se aktualisht sulmet ruse nuk kanë ndaluar dhe forcat mbrojtëse të Ukrainës do të përgjigjen në mënyrë të matur dhe të vendosur ndaj çdo provokimi.