Giorgia Meloni ka reaguar ashpër ndaj trajtimit të aktivistëve të ndaluar pas ndërhyrjes së autoriteteve izraelite ndaj flotiljes humanitare “Sumud”, duke i cilësuar “të papranueshme” pamjet e publikuara nga Itamar Ben-Gvir.
Në një reagim në platformën X, Meloni deklaroi se demonstruesit, mes tyre edhe shtetas italianë, janë trajtuar në mënyrë që “shkel dinjitetin njerëzor”.
Reagimi erdhi pasi Ben-Gvir publikoi një video nga porti i Porti Ashdod, ku aktivistët e ndaluar shfaqeshin duke u tërhequr me forcë nga policia, të gjunjëzuar dhe me duart e lidhura pas shpine.
Kryeministrja italiane bëri të ditur se qeveria në Itali ka nisur menjëherë veprime në nivelet më të larta institucionale për të siguruar lirimin e qytetarëve italianë të përfshirë në incident.
“Italia kërkon gjithashtu një ndjesë për trajtimin e rezervuar ndaj këtyre demonstruesve dhe për shpërfilljen totale ndaj kërkesave të qarta të qeverisë italiane”, deklaroi Meloni.
Ndërkohë, Ministria italiane e Punëve të Jashtme dhe Bashkëpunimit Ndërkombëtar pritet të thërrasë ambasadorin izraelit në Romë për të kërkuar sqarime formale mbi ngjarjen.
Nga ana tjetër, autoritetet izraelite kanë deklaruar se të gjithë 430 aktivistët e flotiljes janë transferuar në Izrael dhe do të lejohen të takojnë përfaqësues konsullorë të vendeve të tyre.