Një tërmet me magnitudë 7.7 ballë ka goditur Mianmarin qendror, duke shkaktuar lëkundje të forta që janë ndjerë edhe në Tajlandë. Sipas Shërbimit Gjeologjik të SHBA-së (USGS), epiqendra ishte 16 kilometra në veriperëndim të qytetit Sagaing, në një thellësi prej 10 kilometrash.

Në kryeqytetin tajlandez, Bangkok, tërmeti ka shkaktuar shembjen e një qiellgërvishtësi 30-katësh në ndërtim e sipër pranë Parkut Chatuchak, duke bllokuar të paktën 43 punëtorë. Deri më tani, raportohet për një viktimë dhe disa të plagosur. Autoritetet kanë shpallur gjendjen e jashtëzakonshme dhe po vazhdojnë operacionet e shpëtimit.

Në Mianmar, qyteti Mandalay ka pësuar dëme të mëdha, përfshirë shembjen e një ure historike në rajonin Sagaing. Rrugët janë çarë, ndërtesat janë dëmtuar dhe ekipet e emergjencës po punojnë për të shpëtuar të bllokuarit. Ende nuk ka një bilanc zyrtar të viktimave.

Një tërmet i dytë me magnitudë 6.4 ballë ka ndodhur 12 minuta më vonë, duke shkaktuar frikë për lëkundje të mëtejshme. Autoritetet kanë urdhëruar evakuimin e ndërtesave të larta në Bangkok dhe pezullimin e fluturimeve në disa aeroporte për vlerësimin e dëmeve.