Pekini dhe Uashingtoni kanë arritur një marrëveshje paraprake për një “kornizë të përgjithshme” që synon lehtësimin e tensioneve të zgjatura tregtare mes dy fuqive kryesore botërore. Ky zhvillim vjen pas dy ditësh bisedimesh në Londër dhe pas muajsh përplasjesh mbi tarifat, aksesin në treg dhe furnizimin me materiale strategjike.
Zëvendëskryeministri kinez, He Lifeng – negociatori kryesor i Kinës për çështjet tregtare me SHBA-në – deklaroi se “të dyja palët duhet të forcojnë bashkëpunimin, të zvogëlojnë keqkuptimet dhe të zgjerojnë konsensusin.”
Sipas mediave shtetërore kineze, dialogu mes dy delegacioneve ka qenë “i sinqertë dhe i thelluar”, dhe është ndërtuar mbi një marrëveshje të përkohshme të arritur muajin e kaluar. Negociatorët thanë se marrëveshja e fundit është rezultat i një bashkëpunimi që nisi me telefonatën mes presidentëve Xi Jinping dhe Donald Trump më 5 qershor.
Në qendër të negociatave: metalet e rralla
Një nga çështjet kyçe në tryezë ishte furnizimi me metalet e rralla – elemente të domosdoshme për teknologjinë moderne si telefonat inteligjentë dhe bateritë e makinave elektrike. SHBA ka akuzuar Kinën për kufizime të qëllimshme të eksporteve të këtyre metaleve, duke ngritur shqetësime për sigurinë e zinxhirit të furnizimit.
Sekretari amerikan i Tregtisë, Howard Latnick, u shpreh optimist pas bisedimeve, duke thënë se beson që kjo çështje “do të zgjidhet”.
Hapat e ardhshëm: miratimi nga liderët
Tani pritet që marrëveshja të miratohet nga dy presidentët – Xi Jinping dhe Donald Trump – për t’u bërë zyrtare. Deri atëherë, bisedimet do të vazhdojnë për të konkretizuar mekanizmat e zbatimit dhe për të garantuar që fjalët të pasohen nga veprime reale, siç kërkoi pala kineze gjatë diskutimeve.
Ky përparim shihet si një hap i rëndësishëm drejt normalizimit të marrëdhënieve tregtare SHBA-Kinë, në një kohë kur rivaliteti ekonomik mes tyre ka pasur ndikim të gjerë në tregjet globale dhe në industrinë teknologjike.