Një armëpushim i përkohshëm ka hyrë në fuqi në qytetin e Oleshky, në Ukrainë, me qëllim lehtësimin e dërgimit të ndihmave humanitare dhe evakuimin e civilëve që jetojnë në kushte të rënda për shkak të luftës.
Marrëveshja parashikon transportimin e furnizimeve jetike për banorët, si dhe pastrimin e rrugëve nga minat, për të mundësuar largimin më të sigurt të tyre nga zona. Sipas autoriteteve ukrainase dhe Ministrisë ruse të Mbrojtjes, armëpushimi po respektohet.
Situata humanitare në qytet është përkeqësuar ndjeshëm. Banorët përballen prej kohësh me mungesë ushqimi, uji dhe energjie elektrike, ndërsa disa prej tyre janë detyruar të gatuajnë barishte për të mbijetuar. Dyqanet janë të mbyllura dhe mundësitë për të siguruar produkte bazë janë tepër të kufizuara.
Sipas vlerësimeve të Kievit, në Oleshky dhe zonat përreth kanë mbetur rreth 6 mijë persona, mes tyre afërsisht 200 fëmijë. Para pushtimit rus në shkurt të vitit 2022, qyteti kishte rreth 24 mijë banorë.
Përpjekjet për evakuim shoqërohen me rreziqe të shumta, pasi rrugët janë të minuara dhe banorët janë të ekspozuar ndaj sulmeve me dronë.
Armëpushimi, për të cilin Shtëpia e Bardhë ka deklaruar se u sigurua nga zonja e parë amerikane Melania Trump, pritet të zgjasë deri më 1 nëntor. Operacioni humanitar po koordinohet nga përfaqësues ukrainas dhe rusë për të drejtat e njeriut, me ndërmjetësimin e Shteteve të Bashkuara.