Serbia ka një presidente në detyrë pas largimit të Aleksandar Vuçiçit nga posti i kreut të shtetit. Ana Brnabiç, e cila drejtonte Parlamentin serb, ka marrë zyrtarisht funksionet presidenciale, ndërsa vendi përgatitet për zgjedhjen e presidentit të ri.
Kalimi i kompetencave u formalizua gjatë një ceremonie të zhvilluar mëngjesin e sotëm në Pallatin Presidencial. Vuçiç i dorëzoi Brnabiç dokumentacionin dhe vulën shtetërore, duke përmbyllur kështu qëndrimin e tij në presidencë.
Mandati i dytë i Vuçiçit, i cili sipas kalendarit të rregullt përfundonte në maj të vitit 2027, u ndërpre pas vendimit të tij për të dhënë dorëheqjen të dielën në mbrëmje. Largimi nga posti lidhet me kandidimin e tij në zgjedhjet parlamentare të parashikuara për 25 tetor.
Dorëheqja hap gjithashtu rrugën për zgjedhje të parakohshme presidenciale. Kushtetuta serbe parashikon që, në një situatë të tillë, votimi për presidentin e ri duhet të organizohet brenda një periudhe prej 90 ditësh. Përpara se të largohej nga detyra, Vuçiç deklaroi se raundi i parë mund të zhvillohet në fund të dhjetorit.
Në fjalën e saj pas marrjes së përgjegjësive të reja, Brnabiç vlerësoi figurën e paraardhësit të saj dhe e konsideroi marrjen e detyrës një nder të madh.
“Unë besoj se nuk kemi pasur kurrë një president të tillë më parë dhe se Serbia nuk do të ketë më kurrë një president që demonstron një vetëmohim të tillë dhe i vë gjithçka në plan të dytë për hir të vendit. Është një nder për mua të marr këtë detyrë nga një person i tillë”, deklaroi Brnabiç.