Një avion stërvitor i Forcave Ajrore të Bangladeshit u rrëzua në kampusin e Milestone School and College në një periferi veriore të Dakës, duke shkaktuar një tragjedi të rëndë me të paktën 27 të vdekur dhe mbi 170 të plagosur.
Ngjarja tragjike ndodhi pasditen e së hënës, pak pasi avioni F-7 u ngrit në ajër për një stërvitje dhe pësoi një defekt teknik.
Piloti, toger fluturimi Md. Taukir Islam, ishte ndër viktimat. Sipas dëshmitarëve, avioni shpërtheu në flakë dhe goditi një ndërtesë dykatëshe të shkollës në një moment kur nxënësit po dilnin pas përfundimit të orëve mësimore. Shumë prej viktimave janë fëmijë të moshës 9–14 vjeç dhe prindër që ndodheshin në oborrin e shkollës.
Studenti Farhan Hasan, i cili sapo kishte përfunduar një provim, tha për “BBC Bangla” se pa mikun e tij të ngushtë të vritej para syve të tij:
“Avioni kaloi mbi kokën e tij… dhe mori me vete shumë prindër që po prisnin fëmijët”.
Pamjet nga vendngjarja tregojnë zjarr të madh dhe tym të dendur, ndërsa mbi 30 ambulanca transportuan të plagosurit drejt spitaleve të kryeqytetit. Më shumë se 50 persona, përfshirë fëmijë dhe të rritur, janë shtruar me djegie të rënda.
Një ditë zie kombëtare është shpallur për të martën, ndërsa flamuri kombëtar do të ulet në gjysmë shtizë. Qeveria e përkohshme e kryesuar nga Muhammad Yunus ka premtuar hetim të plotë dhe mbështetje për familjet e viktimave. Ndërkohë, qytetarë të shumtë janë paraqitur në spitale për të dhuruar gjak.
