Në Gaziantep të Turqisë, një shofer taksie ka arritur të çarmatosë një person që e kishte marrë peng gjatë një incidenti të rrezikshëm me ndjekje policore.

Ngjarja ka ndodhur kur një 58-vjeçar u mor peng nga një çift, një 31-vjeçar dhe një 36-vjeçare, nën kërcënimin e një arme me ajër të kompresuar.

Gjatë arratisjes, i dyshuari ka qëlluar edhe në drejtim të forcave të policisë që po e ndiqnin automjetin.

Ndjekja ka zgjatur nga zona Araban deri në lagjen Sehitkamil, ku policia arriti të bllokojë makinën. Në atë moment, situata është bërë edhe më e rrezikshme, pasi i dyshuari ka tentuar të qëllojë sërish.

Sipas raportimeve, shoferi i taksisë ka reaguar menjëherë dhe i ka marrë armën nga duart autorit, duke e çarmatosur në momentin kritik.

Policia ka arrestuar të dy personat e përfshirë në ngjarje, ndërsa shoferi i taksisë ka pësuar lëndime të lehta. Hetimet për rastin po vijojnë.

Në pamjet e publikuara shihen qytetarë të alarmuar gjatë të shtënave dhe momentit të ndërhyrjes së policisë.