Një gjykatë indiane ka dënuar predikuesin e vetëquajtur të krishterë Bajinder Singh me burgim të përjetshëm për përdhunimin e një gruaje në vitin 2018. Gruaja e kishte akuzuar Singh-un se e kishte përdhunuar në shtëpinë e tij në shtetin verior të Punjabit, duke regjistruar aktin dhe duke përdorur videon më vonë për ta shantazhuar.
Singh, i cili ka miliona ndjekës, u bë i famshëm për predikimet dhe ngjarjet e tij të stilit ungjilltar, ku shihej teksa shëronte njerëz që vuajnë nga sëmundje të rënda duke vendosur duart mbi to. Kisha e tij e “Lavdisë dhe Urtësisë”, e cila është një nga kishat më të mëdha private në Punjab numëron disa yje të Bollywood-it si ndjekës dhe thotë se ka degë në të gjithë botën. Degët janë në vende të tilla si SHBA, Mbretëria e Bashkuar dhe Kanada.
Singh gjithashtu ka një prani të konsiderueshme në mediat sociale me më shumë se tre milionë abonentë në YouTube. Predikuesi është i njohur për dhënien e predikimeve të zjarrta shpesh duke pretenduar se ai mund t’i bëjë njerëzit jashtëzakonisht të pasur dhe t’i shërojë ata nga sëmundjet. Pasi gjykata shpalli dënimin për Singh në rastin e përdhunimit të vitit 2018, avokati i gruas, Anil Sagar, përshëndeti vendimin, duke e quajtur atë një dënim shembullor. Predikuesi është akuzuar edhe për sulm seksual nga të paktën dy gra të tjera.