Reshjet intensive të shiut, të lidhura me fenomenin klimatik El Niño, kanë shkaktuar përmbytje të konsiderueshme në Ishujt Galapagos të Ekuadorit, duke detyruar qindra banorë të braktisin shtëpitë e tyre.
Sipas autoriteteve lokale, të paktën 227 persona janë evakuuar nga zonat e prekura në ishullin Santa Cruz, më i populluari i arkipelagut. Për të shpëtuar nga uji, banorët janë detyruar të përdorin varka, të notojnë apo të kalojnë nëpër ujë që në disa zona arrin deri në bel.
Autoritetet kanë vënë në dispozicion ndihma ushqimore dhe shërbime mjekësore për familjet e prekura, ndërsa situata vijon të mbetet shqetësuese për shkak të reshjeve të pandërprera.
Disa prej banorëve kanë humbur pothuajse gjithçka. Paula Calderon, e cila punon si punëtore shtëpie, tregoi se u largua me urgjencë nga banesa në orët e para të mëngjesit, pasi zjarrfikësit njoftuan për evakuim përmes altoparlantëve. Shtëpia e saj ishte mbuluar plotësisht nga uji.
Ndërkohë, 23-vjeçarja Maria Kompos rrëfeu se niveli i ujit kishte arritur deri në katin e dytë të ndërtesës trekatëshe ku jetonte, duke i shkatërruar gjithçka që kishte arritur të rindërtonte pas dëmeve të mëparshme.
Përmbytjet nuk janë një fenomen i izoluar. Edhe gjatë muajit tetor, arkipelagu u përball me reshje të fuqishme, të cilat shkaktuan një viktimë dhe prekën mijëra persona.
Të dhënat zyrtare tregojnë se që prej 29 gushtit, kur Ekuadori shpalli gjendjen e jashtëzakonshme për shkak të El Niños, në Galapagos janë regjistruar 7,425 persona të prekur nga përmbytjet dhe moti ekstrem.
Në shkallë kombëtare, bilanci është edhe më i rëndë: 22 persona kanë humbur jetën, ndërsa mbi 105 mijë të tjerë janë prekur nga pasojat e kushteve ekstreme atmosferike.
Ekspertët paralajmërojnë se El Niño mund të jetë ndër episodet më të fuqishme të regjistruara ndonjëherë. Fenomeni shoqërohet me rritjen e temperaturave të ujërave të Oqeanit Paqësor dhe ndryshimin e qarkullimit atmosferik, duke shkaktuar reshje të pazakonta, përmbytje dhe fenomene të tjera ekstreme në rajone të ndryshme të globit.
Përveç dëmeve në banesa dhe infrastrukturë, përmbytjet e përsëritura kanë shtuar shqetësimet edhe për ekosistemin e Ishujve Galapagos, të konsideruar si një prej pasurive më të rëndësishme natyrore dhe shkencore në botë.
