Marrëveshja për lehtësimin e përkohshëm të sanksioneve ndaj naftës ruse ka thelluar përplasjet mes Donald Trump dhe Volodymyr Zelenskyt, duke vënë në pikëpyetje edhe vijimin e bashkëpunimit mes Uashingtonit dhe Kievit.

Presidenti amerikan, Donald Trump, ka ashpërsuar qëndrimin ndaj homologut ukrainas, Volodymyr Zelensky, pas kritikave të këtij të fundit për marrëveshjen e arritur me Moskën lidhur me eksportet e naftës ruse.

Gjatë një deklarate për mediat, teksa largohej nga Shtëpia e Bardhë, Trump akuzoi Zelenskyn se po krijon probleme për komunitetin ndërkombëtar, duke vijuar sulmet ndaj rafinerive ruse. Ai shkoi edhe më tej, duke deklaruar se Ukraina ka nevojë për një drejtues të ri që të jetë i gatshëm të arrijë një marrëveshje.

“Është koha që Ukraina të ketë një president të ri”, u shpreh kreu i Shtëpisë së Bardhë, duke pretenduar se Zelensky ka pasur mundësi të shumta për të negociuar, por nuk i ka shfrytëzuar ato.

Deklaratat e Trump erdhën pasi Zelensky kundërshtoi vendimin për të lejuar sërish shitjen e miliona tonëve naftë ruse në tregjet amerikane dhe ndërkombëtare. Sipas presidentit ukrainas, të ardhurat nga këto eksporte do t’i jepnin Moskës burime financiare shtesë për të vijuar luftën kundër Ukrainës. Ai e cilësoi këtë vendim si një favor të drejtpërdrejtë për Vladimir Putinin.

Trump konfirmoi të premten arritjen e një marrëveshjeje me Rusinë për pezullimin e sanksioneve ndaj eksporteve të naftës deri më 7 prill.

Ndërkohë, tensionet janë reflektuar edhe në kontaktet diplomatike mes dy vendeve. Delegacioni ukrainas dhe përfaqësuesit e administratës Trump u takuan në Miami për të diskutuar mundësitë e bindjes së Rusisë për t’i dhënë fund luftës. Megjithatë, bisedimet u ndërprenë pasi pala ukrainase u informua për marrëveshjen e naftës mes Uashingtonit dhe Moskës.

Gjatë takimit, sipas raportimeve, Steve Witkoff dhe Jared Kushner i paralajmëruan përfaqësuesit e Kievit se vazhdimi i sulmeve ndaj rafinerive ruse mund të sillte ndërprerjen e shkëmbimit të informacionit të inteligjencës amerikane me Ukrainën.

Pavarësisht këtij paralajmërimi, një zyrtar ukrainas deklaroi se sulmet ndaj objektivave ruse do të vijojnë. Në shenjë pakënaqësie pas zhvillimeve të fundit, delegacioni ukrainas vendosi të kthehej në vend dhe të anulonte raundin e dytë të bisedimeve me përfaqësuesit amerikanë, të planifikuar për të shtunën, më 10 tetor.

Zhvillimet e fundit sinjalizojnë një përkeqësim të mëtejshëm të marrëdhënieve mes Trump dhe Zelenskyt, në një moment kur përpjekjet diplomatike për t’i dhënë fund luftës në Ukrainë përballen me pengesa të reja.