Një gjykatë në Egjipt ka dhënë dënimin kapital për prezantuesen e njohur televizive Sarah Khalifa dhe 11 persona të tjerë, të akuzuar si pjesëtarë të një organizate të përfshirë në prodhimin dhe tregtimin e lëndëve narkotike.
Sipas medias shtetërore “Al-Ahram”, grupi siguronte nga jashtë vendit substanca dhe materiale që përdoreshin për përgatitjen e drogës, e cila më pas hidhej në treg. Gjatë operacionit, autoritetet sekuestruan mbi 750 kilogramë lëndë narkotike dhe përbërës të dyshuar, si dhe armë e municione të mbajtura pa leje.
Në dosjen e njëjtë penale, nëntë persona të tjerë u dënuan me burgim të përjetshëm, ndërsa shtatë të akuzuar u liruan nga përgjegjësia penale.
Khalifa, 39 vjeçe, është bërë e njohur për publikun përmes programit “Mission Impossible”, në të cilin trajtoheshin ngjarje dhe tema të kronikës. Gjatë gjithë procesit ajo ka kundërshtuar akuzat, ndërsa përfaqësuesi i saj ligjor ka njoftuar se vendimi do të ankimohet.
Dënimi ishte shqiptuar paraprakisht një muaj më parë, por konfirmimi përfundimtar erdhi pasi gjykata mori mendimin këshillimor të Myftiut të Madh të Egjiptit. Ky është një hap procedural i parashikuar për çështjet ku kërkohet dënimi me vdekje.
Prokuroria mbështeti akuzën në dëshmitë e 20 personave dhe në materiale elektronike, mes të cilave komunikime dhe regjistrime filmike. Sipas “Akhbar al-Youm”, Khalifa ka deklaruar përpara trupit gjykues se nuk kishte pasur më parë kontakt me drogën dhe se e kishte parë atë vetëm pasi ishte fotografuar në ambientet e strukturave kundër narkotikëve.
Të dhënat e Amnesty International tregojnë se gjatë vitit 2025 gjykatat egjiptiane shqiptuan 492 dënime kapitale dhe se 23 persona u ekzekutuan. Organizata rithekson se, sipas standardeve ndërkombëtare, ky ndëshkim duhet të zbatohet vetëm për krimet më të rënda që përfshijnë vrasje të qëllimshme.