Një ngjarje e rëndë është regjistruar në transportin publik në Sydney të Australisë, ku një pasagjer është sulmuar brutalisht nga një grup të rinjsh pasi u kërkoi të ulnin volumin e muzikës. Incidenti ndodhi mesditën e së shtunës në një tren urban dhe u filmua nga udhëtarë të tjerë që ndodheshin në vendngjarje.

Në videon që po qarkullon në rrjetet sociale, shihen disa të rinj duke goditur me grushte burrin, ndërsa pasagjerët e pranishëm mbeten të shokuar nga skena e dhunshme.

Sipas dëshmive të personave në tren, grupi po konsumonte alkool dhe kishte vendosur muzikë me volum shumë të lartë. Pasagjeri u kishte kërkuar qetësisht të tregonin më shumë respekt ndaj udhëtarëve të tjerë, por situata degradoi menjëherë në konflikt fizik.

Policia australiane ka nisur hetimet për identifikimin e autorëve, të cilët u larguan menjëherë pas incidentit. Autoritetet po kërkojnë gjithashtu ndihmën e qytetarëve për çdo informacion që mund të çojë në kapjen e tyre.

Ndërkohë, kompania e transportit publik dënoi ashpër ngjarjen, duke deklaruar se dhuna nuk do të tolerohet në asnjë formë. “Siguria e pasagjerëve dhe stafit mbetet prioritet absolut dhe do të bashkëpunojmë ngushtë me policinë,” thuhet në reagimin zyrtar.

Ngjarja ka ndezur debat në rrjetet sociale, ku shumë përdorues kanë kritikuar sjelljen e të rinjve dhe mungesën e reagimit nga pasagjerët e tjerë gjatë sulmit.