Vajza e biznesmenit dhe aktivistit pro-demokraci Jimmy Lai ka ngritur alarmin për përkeqësimin e gjendjes shëndetësore të të atit, i cili ndodhet në burg në Hong Kong prej më shumë se katër vitesh. Ajo shprehet se gjendja e tij është rënduar ndjeshëm dhe se ka dyshime serioze për keqtrajtim gjatë paraburgimit.
Jimmy Lai, 78 vjeç, mbahet i arrestuar që nga dhjetori i vitit 2020 dhe rrezikon dënim me burgim të përjetshëm. Së fundmi, ai u shpall fajtor për bashkëpunim me forca të huaja, në bazë të Ligjit të Sigurisë Kombëtare, një ligj i diskutueshëm që u miratua për të shtypur lëvizjen pro-demokraci në Hong Kong.
Claire Lai, vajza e tij, e cila jeton në mërgim në Londër, i ka thënë BBC-së se babai i saj ka humbur shumë peshë dhe vuan nga disa probleme serioze shëndetësore, përfshirë diabetin, problemet me zemrën dhe dhimbjet e forta të shpinës. Sipas saj, në disa raste ai nuk arrin as të qëndrojë në këmbë apo të ngrihet nga shtrati. Ajo shtoi se gjendja e tij fizike ka ndryshuar ndjeshëm gjatë vitit të fundit, krahasuar me kohën kur u fut në burg.
Familja e Lai-t ka shprehur vazhdimisht shqetësime për shëndetin e tij. Djali i tij, Sebastien, ka deklaruar më herët se trupi i babait të tyre “po shkatërrohet gradualisht”.
Ndërkohë, autoritetet kineze mohojnë çdo akuzë për keqtrajtim. Një zëdhënës i Zyrës së Komisionerit të Ministrisë së Jashtme kineze në Hong Kong ka deklaruar se Jimmy Lai ndodhet në gjendje të mirë shëndetësore dhe se i janë garantuar kushte të sigurta dhe humane në burg.
BBC bën me dije se ka pasur akses në një letër të familjes Lai, drejtuar kryeministrit britanik Keir Starmer, ku i kërkohet që të ngrejë çështjen e lirimit të tij gjatë takimit të ardhshëm me presidentin kinez Xi Jinping. Ky takim, i planifikuar për fundin e janarit 2026, do të shënojë vizitën e parë të një kryeministri britanik në Kinë që nga viti 2018.
Pas dënimit të Lai-t, Mbretëria e Bashkuar e ka cilësuar rastin si një ndjekje penale të motivuar politikisht dhe ka kërkuar shfuqizimin e Ligjit të Sigurisë Kombëtare. Kina i ka hedhur poshtë këto kritika, duke i konsideruar si ndërhyrje në sistemin e saj të drejtësisë.