Polonia nuk dëshiron që armët bërthamore të aleatëve të NATO-s të vendosen në territorin e saj. Deklarata është bërë të enjten nga zëvendësministri polak i Mbrojtjes, Pawel Zalewski, në selinë e NATO-s në Bruksel.
“Polonia nuk dëshiron të ketë koka bërthamore në territorin e saj”, deklaroi Zalewski për gazetarët, duke sqaruar se Varshava megjithatë synon të ketë një rol më të madh në strategjinë e parandalimit bërthamor të aleancës.
Sipas tij, përfshirja e Polonisë në mekanizmat e parandalimit bërthamor të NATO-s nuk do të thotë domosdoshmërisht që armët bërthamore të vendosen në territorin polak.
Qëndrimi i Varshavës vjen në një moment kur shqetësimet për sigurinë e krahut lindor të NATO-s janë shtuar ndjeshëm për shkak të kërcënimit rus.
Polonia ka zhvilluar diskutime me Shtetet e Bashkuara për forcimin e kapaciteteve amerikane të parandalimit bërthamor në Evropë. Në të njëjtën kohë, Varshava është përfshirë në diskutime me Francën për zgjerimin e rolit të ombrellës së saj të mbrojtjes në kontinent.
Megjithatë, presidenti polak Karol Nawrocki ka mbajtur një qëndrim më të hapur për të ardhmen, duke mos përjashtuar mundësinë që Polonia të zhvillojë një program të vetin të armëve bërthamore.
Kështu, ndërsa Varshava kundërshton vendosjen e kokave bërthamore të aleatëve në territorin e saj, debati për rolin e Polonisë në strategjinë bërthamore të Evropës mbetet i hapur.