Parlamenti i Mbretërisë së Bashkuar pritet të votojë të martën nëse do të nisë një hetim ndaj kryeministrit Keir Starmer, lidhur me dyshimet se ai mund të ketë mashtruar Dhomën e Komunave për emërimin e ish-ambasadorit Peter Mandelson.
Sipas raportimit të gazetës “The Times”, Starmer ka qenë prej muajsh në qendër të kritikave për vendimin e tij për të emëruar Mandelson në postin e ambasadorit në Shtetet e Bashkuara. Emërimi është kundërshtuar për shkak të lidhjeve të mëparshme të Mandelson me Jeffrey Epstein, i dënuar për krime të rënda, i cili vdiq në vitin 2019.
Çështja mund të ketë pasoja serioze për të ardhmen politike të Starmer, nëse provohet se ai ka dhënë informacione të pasakta para parlamentit. Deri tani, ai i ka rezistuar thirrjeve për dorëheqje, pavarësisht presionit në rritje.
Ndërkohë, kryetarja e Dhomës së Komunave, Lindsay Hoyle, pritet të miratojë zhvillimin e një debati dhe votimi për të vendosur nëse çështja duhet t’i kalojë komisionit përkatës që heton shkeljet e mundshme të privilegjit parlamentar.
Mandelson u shkarkua në shtatorin e kaluar, pasi vetë Starmer e akuzoi se kishte “gënjyer vazhdimisht” për marrëdhënien e tij me Epstein. Sipas gazetës “The Guardian”, Ministria e Jashtme i kishte dhënë atij autorizim sigurie për të marrë detyrën në janar 2025, pavarësisht rezervave të ngritura nga një komision verifikimi.
Zhvillimet morën një kthesë të re pasi ish-zyrtari i lartë i diplomacisë britanike, Ollie Robbins, deklaroi në parlament se kishte pasur “presion të vazhdueshëm” nga Downing Street gjatë procesit të emërimit të Mandelson.