Përpara Volodymyr Zelensky-t, të cilin e priti sot në Varshavë, presidenti nacionalist i Polonisë Karol Nawrotski akuzoi ukrainasit se janë mosmirënjohës për ndihmën që kanë marrë që nga pushtimi në shkallë të gjerë i vendit të tyre nga Rusia.

Që nga shkurti i vitit 2022, Polonia ka pritur më shumë se një milion refugjatë dhe është një nga furnizuesit më të rëndësishëm të armëve për Kievin. Është gjithashtu vendi përmes të cilit kalon pjesa më e madhe e ndihmës ushtarake dhe humanitare të Perëndimit për fqinjin e saj.

“Polakët kanë ndjesinë se përpjekjet tona, ndihma, në shumë forma, e ofruar Ukrainës që nga fillimi i pushtimit në shkallë të gjerë, nuk vlerësohen dhe as nuk kuptohen siç duhet”, tha Navrotsky në një konferencë të përbashkët për shtyp me Zelenskyn.

“E përcolla këtë në një bisedë të sinqertë, por shumë të përzemërt dhe me respekt me Presidentin Zelensky”, shtoi ai.

Ky i fundit u përgjigj se “Ukraina i ka qenë gjithmonë mirënjohëse Polonisë dhe do të mbetet e tillë”, duke kujtuar se vendi i tij “mbron Evropën” kundër Rusisë, me një kosto shumë të lartë njerëzore.

“Rusia dëshiron përçarje, dëshiron të shkatërrojë një aleancë kaq të fortë, aleancën e dy kombeve që ka mbajtur së bashku Ukrainën dhe Poloninë për shumë breza. Ne nuk do ta lejojmë”, paralajmëroi ai.

Nawrotski nuk e bëri të qartë se çfarë pret nga Kievi. Presidenti polak, një historian, ka bërë thirrje për bashkëpunim më të mirë midis dy vendeve mbi çështjen delikate të masakrës së rreth 100,000 polakëve në Volhynia midis viteve 1943 dhe 1945 nga nacionalistët ukrainas. Sipas Nawrotskit, i cili e quan masakrën një “gjenocid”, Kievi nuk dëshiron ta pranojë përgjegjësinë e tij. Varshava akuzon gjithashtu Ukrainën për pengimin e zhvarrosjes së viktimave.

Të enjten, presidenti ukrainas siguroi për vullnetin e mirë të qeverisë së tij për këto çështje.

“Pala polake shpreson që procesi të përshpejtohet, pala ukrainase është e gatshme të ndërmarrë një hap në këtë drejtim. Këto nuk janë fjalë, por masa konkrete”, tha ai.

Pas takimit, Nawrotski komentoi në Platformën X se ishte një “fillim i ri” në marrëdhëniet dypalëshe të Polonisë me Ukrainën, duke shtuar: “Lajm i keq për Putinin”.