Pas disa ditësh në protesta, fermerët grek i dërguan listën e kërkesave të tyre qeverisë dhe kryeministrit Kyriakos Mitsotakis.

Ndër kërkesat kryesore janë vendosja e çmimeve minimale të garantuara për produktet bujqësore, energjia elektrike për bujqësinë me çmim 7 cent për kilovat/orë, si dhe refuzimi i integrimit të OPEKEPE në Autoritetin e të Ardhurave Publike (AADE). Kujtohet se, pavarësisht thirrjeve të qeverisë, fermerët refuzuan ftesën e kryeministrit për dialog me përfaqësuesit e tyre në Pallatin Maximos pasditen e së hënës.

Ata deklarojnë se do t’i kalojnë festat në bllokadat rrugore, duke kërkuar plotësimin e kërkesave të tyre, ndërsa paralajmërojnë intensifikim të protestave.

Kërkesat e fermerëve

  • Ndërprerja e represionit shtetëror, autoritarizmit dhe gjykimeve ndaj fermerëve; shfuqizimi i të gjitha çështjeve penale që lidhen me protestat, me vendim të Parlamentit.
  • Pagesa e menjëhershme e të gjitha detyrimeve financiare që qeveria u ka fermerëve.
  • Çmime minimale të garantuara që mbulojnë koston e prodhimit dhe sigurojnë të ardhura të qëndrueshme.
  • Ulje e kostos së prodhimit: naftë pa taksa, energji elektrike bujqësore me tavan çmimi 7 cent/kWh, shfuqizim i bursës së energjisë, subvencione për inputet bujqësore dhe heqje e TVSH-së.
  • Kompensim i humbjes së të ardhurave për vitin 2025 për produktet që shiten nën koston e prodhimit.
  • Projekte infrastrukturore për bujqësinë (ujitje, mbrojtje nga përmbytjet dhe zjarret, rrugë bujqësore).
  • Ndryshim i rregullores së ELGA-s për sigurim dhe kompensim 100% nga fatkeqësitë natyrore dhe sëmundjet.
  • Lidhja e subvencioneve me prodhimin real bujqësor dhe blegtoral.
  • Shfuqizimi i ATAK–KAEK për toka nën 20 dynymë dhe pagesa e menjëhershme e të gjitha AFM-ve të bllokuara.
  • Ndalimi i importeve masive dhe i “grekizimit” të produkteve të huaja.
  • Ngrirje e borxheve ndaj institucioneve shtetërore dhe bankave, me shlyerje pa interes.
  • Pa ulje të fondeve të Politikës së Përbashkët Bujqësore (CAP).
  • Shfuqizimi i fletës elektronike të transportit nga ara.
  • Dyfishim i menjëhershëm i pensioneve bujqësore.

Në mënyrë të veçantë, fermerët theksojnë dy çështje urgjente:

  • -Sëmundjet në blegtori, me vaksinim, kompensim të plotë për kafshët e asgjësuara dhe rindërtim falas të tufave.
  • -Skandali OPEKEPE, me kërkesë për kthimin e fondeve të përvetësuara tek përfituesit realë, zbardhjen e përgjegjësive politike dhe penale dhe refuzimin e integrimit të institucionit në AADE.