Presidenti amerikan Donald Trump shkaktoi një situatë të pakëndshme gjatë një takimi në Zyrën Ovale me kryeministren e Japonisë, Sanae Takaichi, kur komentoi mbi vendimin e SHBA-së për të goditur Iranin pa njoftuar paraprakisht disa aleatë, mes tyre edhe Japoninë. Duke iu përgjigjur një pyetjeje të një gazetareje japoneze, ai bëri një krahasim të papritur me sulmin e Japonisë ndaj Pearl Harborit në vitin 1941.
Trump tha se operacioni ishte mbajtur sekret për të ruajtur efektin e befasisë, duke shtuar me tone ironike se Japonia “e di mirë çfarë do të thotë një sulm i papritur”. Komenti u shoqërua me një referencë direkte ndaj Pearl Harborit, çka krijoi një moment tensioni në sallë. Pamjet e publikuara treguan reagimin e rezervuar të delegacionit japonez, ndërsa disa zyrtarë amerikanë të pranishëm reaguan me të qeshura.
Deklarata e presidentit u cilësua nga vëzhguesit si e pazakontë dhe jo fort diplomatike, pasi dukej se vendoste në një plan krahasues operacionin e fundit ushtarak me një nga ngjarjet më të ndjeshme historike për marrëdhëniet SHBA–Japoni. Sulmi i 7 dhjetorit 1941 ndaj bazës amerikane në Hawaii ishte dënuar ashpër në atë kohë nga presidenti Franklin D. Roosevelt, i cili e përshkroi atë si “një datë që do të mbetet në turp”.
Situata u bë edhe më e ndërlikuar kur Trump shtoi se japonezët, sipas tij, i kushtojnë rëndësi të veçantë elementit të befasisë, duke e lidhur këtë me strategjinë e operacionit kundër Iranit. Ai më pas theksoi se sulmi kishte arritur objektivat e tij ushtarake.
Ndërkohë, analistët kujtuan se edhe sulmi i befasishëm i Japonisë në Pearl Harbor pati fillimisht sukses në aspektin taktik, por përfundimisht çoi në përfshirjen e SHBA-së në Luftën e Dytë Botërore dhe në humbjen e Japonisë në konflikt.