Sipas një analize të “Bloomberg”, vetëpërmbajtja e Uashingtonit ka nxitur Kremlinin të vazhdojë ofensivën në Ukrainë. Pas takimit të muajit gusht me Donald Trump, i cili nuk prodhoi një marrëveshje konkrete, Vladimir Putin vijoi planin e tij duke intensifikuar sulmet ndaj objektivave ushtarake dhe civile. Presidenti ukrainas Volodymyr Zelensky ka refuzuar kategorikisht kërkesat e Moskës për të lëshuar më shumë territor në lindje të vendit, ndaj Putin po përqendrohet në goditjen e rrjetit energjetik dhe infrastrukturës strategjike të Kievit. Burime të cituara nga “Bloomberg” thonë se bisedimet në Alaska e kanë bindur Putinin se Trump nuk ka interes të ndërhyjë në konflikt.

Shantazhi bërthamor

Krahas luftës në Ukrainë, Putin po ndjek me vëmendje edhe ofensivën izraelite në Gaza, e drejtuar nga Benjamin Netanyahu. Sipas burimeve pranë Moskës, ai e sheh fushatën izraelite si më të ashpër se lufta në Ukrainë dhe vëren se Perëndimi e ka pranuar kryesisht atë, duke dobësuar kritikat ndaj Rusisë. Analisti Nikolai Petrov thekson se për shkak se Moska nuk ka arritur fitore të dukshme në fushëbetejë, Putini po e shndërron strategjinë në shantazh bërthamor dhe presion psikologjik përmes bombardimeve masive. Kështu, përshkallëzimi shihet si mënyra më e shpejtë për ta detyruar Kievin të negociojë sipas kushteve të tij. Burime të tjera shtojnë se Trump nuk pritet të ndërmarrë hapa seriozë për forcimin e mbrojtjes së Ukrainës.

Zhgënjimi i Trump

Në muajin pas takimit, sulmet ajrore ruse janë rritur me rreth 46 për qind, sipas të dhënave të Forcave Ajrore të Ukrainës. Vetëm në shtator, Rusia ka lëshuar 3,500 dronë, afro 190 raketa dhe mbi 2,500 bomba, bëri të ditur Zelensky më 16 shtator. Gjatë një vizite në Mbretërinë e Bashkuar, Trump u shpreh i zhgënjyer nga veprimet e Putinit, duke thënë se “ai po vret shumë njerëz, por po humb më shumë sesa po vret, me ushtarët rusë që vdesin në një shkallë më të lartë se ukrainasit”.

Negociatat e ardhshme

Në takimin e Anchorage, Putin kishte ofruar të ndalonte luftimet nëse Ukraina tërhiqej plotësisht nga Donetsku dhe Luhansku, kufizonte madhësinë e ushtrisë dhe hiqte dorë nga anëtarësimi në NATO. Refuzimi i Kievit për këto kushte e bindi Kremlinin se përshkallëzimi ishte i domosdoshëm. Analistja Vita Spivak thekson se Putini synon t’i tregojë Trumpit dhe aleatëve evropianë se ende ka kapacitet të rrisë presionin, duke kërkuar të forcojë pozitat e tij për raundin e ardhshëm të negociatave mbi Ukrainën.