Bashkimi Europian ka deklaruar se nuk është momenti për të lehtësuar sanksionet ndaj Rusisë, edhe pse lufta në Lindjen e Mesme ka rritur çmimet e energjisë. Presidentja e Komisionit Europian Ursula von der Leyen së bashku me kreun e Këshillit Europian Antonio Costa, gjatë një videokonference me liderët e G7, të organizuar nga presidenti francez Emmanuel Macron dhanë qëndrimin e tyre zyrtar për situatën në Iran dhe rajon.
Ata u shprehën se prioriteti i menjëhershëm është që rrjedhat e energjisë të mos ndërpriten, veçanërisht transporti detar në Ngushticën e Hormuzit, një nyje kyçe për ekonominë globale. Dy liderët europianë përshëndetën edhe vendimin e Agjencisë Ndërkombëtare të Energjisë për të hedhur në treg 400 milionë fuçi naftë nga rezervat emergjente për të ulur presionin në tregjet energjetike.
Nga ana tjetër, presidenti rus, Vladimir Putin ka deklaruar se Kremlini është gati të furnizoj Evropën me naftë dhe gaz. Rusia është eksportuesi i dytë më i madh i naftës në botë dhe mban rezervat më të mëdha të gazit natyror në botë. Bashkimi Evropian ndaloi importet detare të naftës bruto ruse në vitin 2022, ndërsa eksportet e tubacioneve të Rusisë në Hungari dhe Sllovaki janë ndaluar në mënyrë efektive që nga janari për shkak të dëmtimit të tubacionit të naftës Druzhba përmes Ukrainës.