Një valë ekstreme të nxehti që ka përfshirë Francën ka shkaktuar viktima, ndërsa vendi regjistroi temperaturat më të larta të matura ndonjëherë në historinë e tij.
Të martën, termometri arriti në 44.3 gradë Celsius në qytetin Pissos, në jugperëndim të Francës, duke shënuar një rekord të ri kombëtar për temperaturën më të lartë të regjistruar ndonjëherë.
Mes pasojave tragjike të vapës së fortë ishte edhe vdekja e një shtetaseje britanike në një kamping në Francën perëndimore. Gruaja e moshuar ndodhej me bashkëshortin e saj në kampingun Baie d’Aunis, në qytetin bregdetar La Tranche-sur-Mer, kur u ndje papritur keq. Pavarësisht përpjekjeve për t’i ardhur në ndihmë, ajo humbi jetën.
Një tjetër ngjarje e rëndë u raportua në periferi të Parisit, ku një djalë vetëm tre vjeç u gjet pa shenja jete brenda një automjeti, në një ditë kur temperaturat në kryeqytetin francez arritën deri në 41 gradë Celsius.
Sipas burimeve policore, prindërit e fëmijës e kishin dërguar në dhomë për të fjetur pasi ai ishte ankuar se ndihej i lodhur. Rreth 45 minuta më vonë, ata vunë re se djali nuk ndodhej më në dhomën e tij.
Pas kërkimeve, familjarët e gjetën të pavetëdijshëm brenda makinës së parkuar pranë banesës. Ekipet e emergjencës mbërritën në vendngjarje, por nuk mundën t’i shpëtonin jetën.
Hetimet paraprake sugjerojnë se vogëlushi mund të jetë futur vetë në automjet dhe të ketë mbetur i bllokuar brenda, por autoritetet ende nuk kanë sqaruar se si ai përfundoi në makinë dhe në çfarë rrethanash ndodhi tragjedia.