Tre vullnetarë të Kryqit të Kuq kanë humbur jetën në Republikën Demokratike të Kongos, pas dyshimeve se janë infektuar me virusin Ebola gjatë punës së tyre në terren.
Sipas Federatës Ndërkombëtare të Kryqit të Kuq dhe Gjysmëhënës së Kuqe, vullnetarët dyshohet se u infektuan më 27 mars gjatë menaxhimit të trupave të pajetë në rajonin Ituri, përpara se shpërthimi i virusit të identifikohej zyrtarisht.
Viktimat janë identifikuar si Alikana Udumusi Augustin, Sezabo Katanabo dhe Ajiko Chandiru Viviane. Ata punonin në qytetin Mongwalu, i cili konsiderohet epiqendra e shpërthimit aktual të Ebolës.
Tre vullnetarët ndërruan jetë në periudhën mes 5 dhe 16 majit.
Organizata deklaroi se ata humbën jetën duke i shërbyer komunitetit “me guxim dhe humanizëm”.
Autoritetet shëndetësore paralajmërojnë se trupat e viktimave të Ebolës mbeten shumë infektivë edhe pas vdekjes, pasi virusi transmetohet përmes lëngjeve trupore.
Shpërthimi aktual lidhet me variantin e rrallë Bundibugyo Ebola, për të cilin ende nuk ekziston një vaksinë e provuar.
Sipas ekspertëve, kjo formë e virusit ka një normë vdekshmërie prej rreth një të tretës së rasteve të infektuara.
Deri tani, shpërthimi ka shkaktuar mbi 850 raste të dyshuara dhe më shumë se 200 viktima të dyshuara në Republikën Demokratike të Kongos.