Administrata e presidentit Donald Trump ka zhvilluar bisedime sekrete me Hamasin për mundësinë e lirimit të pengjeve amerikane që mbahen në Gaza, raporton Reuters.
Adam Boehler, dërguari i posaçëm i SHBA për çështjet e pengjeve, ka zhvilluar bisedime të drejtpërdrejta me Hamasin javët e fundit në Doha, sipas burimeve të Reuters, duke konfirmuar një raport nga Axios.
Për shumicën e kohës, SHBA-të kishin shmangur diskutimet e drejtpërdrejta me Hamasin, që është klasifikuar si organizatë terroriste nga Departamenti Amerikan i Shtetit që prej vitit 1997.
Sidoqoftë, këto bisedime duket se janë përqendruar në mundësinë e lirimit të pengjeve amerikane, por gjithashtu ka pasur diskutime për një marrëveshje më të gjerë që mund të përfshijë lirimin e të gjithë pengjeve izraelitë dhe një armëpushim më afatgjatë.
Pjesë e këtyre negociatave është edhe Steve Witkoff, dërguari i presidentit Trump për Lindjen e Mesme, i cili pritet të kthehet në rajon për të eksploruar mundësitë për të zgjatur fazën e parë të armëpushimit në Gaza, ose për të kaluar në fazën e dytë.
Faza e parë e armëpushimit, e cila ka ndalur luftën 15-mujore në Rripin e Gazës, ka çuar në lirimin e 33 pengjeve dhe tetë trupave të pajetë në këmbim të lirisë së rreth 2,000 të burgosurve palestinezë. Ndërsa për fazën e dytë, negociatat kanë ngecur, dhe ka pasur akuza të ndërsjella mes Izraelit dhe Hamasit.