Një stjuardesë është gjetur e gjallë, ende e lidhur në sediljen e saj, jashtë trupit të avionit në New York pas përplasjes.
Sipas raportimeve, sedilja e saj kishte rënë përmes një hapjeje të krijuar në dyshemenë e avionit gjatë goditjes, duke përfunduar jashtë mjetit fluturues. Ajo ka pësuar lëndime serioze, por ndodhet jashtë rrezikut për jetën.
Avioni i Air Canada, me 73 pasagjerë dhe katër anëtarë ekuipazhi në bord, kishte përfunduar një ulje të sigurt pas fluturimit nga Montreali. Megjithatë, gjatë lëvizjes në pistë, ai u përplas me një mjet shërbimi me një shpejtësi rreth 160 km/h.
Si pasojë e incidentit, 43 persona u transportuan në spital me lëndime të ndryshme, nga fraktura deri në mavijosje. Shumica janë liruar tashmë, ndërsa nëntë persona vijojnë të marrin trajtim mjekësor. Dy punonjës të zjarrfikëses ndodhen në gjendje të qëndrueshme.
Ndërkohë, audio nga kulla e kontrollit ka regjistruar momente paniku, ku dëgjohet një alarm i fortë dhe thirrje të vazhdueshme për të ndaluar një mjet që po hynte në pistë, vetëm pak sekonda para përplasjes fatale.