Kryetarja e Këshillit të Federatës së Rusisë, Valentina Matviyenko, ka deklaruar se Moska nuk do të ndërmarrë veprime si ato të Shteteve të Bashkuara ndaj liderëve të huaj, duke përmendur rastin e fundit në Venezuelë.
Në një intervistë për mediat ruse, ajo theksoi se Rusia nuk do të tentojë kapjen apo rrëmbimin e presidentit ukrainas Volodymyr Zelensky, duke e cilësuar një veprim të tillë si të papranueshëm për standardet e vendit të saj.
“Ky nuk është stili ynë. Është çështje vetërespekti. Nëse do ta bënim një gjë të tillë, do të humbisnim respektin për veten tonë”, u shpreh ajo.
Matviyenko komentoi edhe zhvillimet që lidhen me presidentin venezuelian Nicolás Maduro, pas operacionit të ndërmarrë nga Shtetet e Bashkuara në fillim të janarit. Sipas saj, veprime të tilla nuk sjellin përfitime reale dhe lënë pasoja në reputacionin ndërkombëtar.
Ajo përmendi gjithashtu se ngjarje të tilla mbeten si “njollë në histori”, duke theksuar se Rusia synon të ruajë një qasje ndryshe në marrëdhëniet ndërkombëtare.
Deklaratat e saj vijnë në një moment tensionesh të vazhdueshme globale, ku veprimet ushtarake dhe ndërhyrjet ndërkombëtare po mbeten në qendër të debatit diplomatik.