Rusia është e gatshme në parim të rifillojë bisedimet trepalëshe me Shtetet e Bashkuara dhe Ukrainën në nëntor, me synimin për t’i dhënë fund luftës. Lajmin e bëri të ditur këshilltari i politikës së jashtme të Kremlinit, Yuri Ushakov, pas takimit të presidentit rus Vladimir Putin me të dërguarin amerikan Steve Witkoff.
Sipas propozimit të diskutuar, raundi i ri i negociatave mund të zhvillohet në Abu Dhabi, rreth mesit të nëntorit. Bisedimet pritet të përqendrohen te krijimi i një sistemi sigurie për Rusinë dhe Ukrainën pas përfundimit të konfliktit. Ushakov bëri të ditur se Witkoff e informoi Putinin për takimet e zhvilluara në Oslo, ku i dërguari amerikan u takua me presidentin ukrainas Volodymyr Zelensky, kryeministrin norvegjez dhe presidentin finlandez.
Mediat e huaja bëjnë me dije se, gjatë këtyre diskutimeve u paraqitën qasje të reja nga pala evropiane dhe Kievi, por jo të gjitha propozimet u konsideruan të dobishme për zgjidhjen e krizës. Takimi mes Putinit dhe Witkoffit zgjati rreth tri orë. Përveç luftës në Ukrainë, palët diskutuan edhe çështje të tjera ndërkombëtare, përfshirë krizën në Iran.
Sa i përket Teheranit, Putin riafirmoi se diplomacia mbetet një mundësi për arritjen e marrëveshjeve dhe se Moska është e gatshme të vazhdojë përpjekjet për gjetjen e një zgjidhjeje politike dhe diplomatike. Raundi i fundit i bisedimeve trepalëshe mes Rusisë, Ukrainës dhe SHBA-së u zhvillua në shkurt. Ende nuk janë bërë të ditura detaje përfundimtare mbi datën dhe formatin e raundit të propozuar për nëntor.