Gazeta amerikane The New York Times ka publikuar detaje të reja mbi bashkëpunimin mes Rusisë dhe Iranit në mes të tensioneve në Lindjen e Mesme, duke ngritur dyshime për një korridor të fshehtë furnizimi ushtarak përmes Detit Kaspik.
Sipas raportimit, Moska dyshohet se po transporton pjesë dronësh dhe pajisje të tjera ushtarake drejt Iranit përmes rrugëve detare në Detin Kaspik, duke shmangur kalimin në Ngushticën e Hormuzit dhe vëmendjen e kontrolleve ndërkombëtare.
Raporti, i bazuar në burime amerikane që kanë folur në kushte anonimiteti, thekson se kjo rrugë po përdoret intensivisht pas dëmtimeve të mëdha që Irani pësoi nga sulmet e fundit amerikane dhe izraelite ndaj infrastrukturës së tij ushtarake.
Sipas zyrtarëve amerikanë, Teherani ka humbur një pjesë të konsiderueshme të flotës së dronëve gjatë përshkallëzimit të fundit të konfliktit, duke e bërë të domosdoshëm furnizimin e shpejtë me pjesë këmbimi dhe pajisje të reja për rikthimin e kapaciteteve operacionale.
Deti Kaspik po shihet tashmë si një korridor strategjik mes Rusisë dhe Iranit, jo vetëm për pajisje ushtarake, por edhe për mallra të rëndësishme si drithërat, ushqimi për kafshë dhe vaji i lulediellit, që më herët transportoheshin përmes rrugëve tradicionale në Gjirin Persik.
Ekspertët e sigurisë ndërkombëtare paralajmërojnë se kjo rrugë detare po shfrytëzohet gjithnjë e më shumë për të shmangur sanksionet dhe monitorimin ndërkombëtar. Nicole Grajewski e cilësoi Detin Kaspik si një zonë ideale për lëvizje të fshehta ushtarake, ndërsa analisti Luke Coffey tha se kjo hapësirë mbetet jashtë vëmendjes së politikëbërësve amerikanë.