Transkriptet e publikuara së fundmi zbulojnë se Péter Szijjártó, ministri i Jashtëm i Hungarisë, ka kontaktuar disa herë me homologun e tij rus, Sergey Lavrov, për të informuar mbi negociatat e Bashkimit Evropian për hapjen e bisedimeve të pranimit me Ukrainën. Një telefonatë e vitit 2023, e regjistruar gjatë një samiti të BE-së më 14 dhjetor, tregon se Szijjártó doli nga takimi për t’i thënë Lavrovit për gjendjen e diskutimeve, ku Lavrovi u shpreh: “Ndonjëherë shantazhi i drejtpërdrejtë me dashamirësi është opsioni më i mirë.”
Rrjedhjet vijnë vetëm disa ditë para zgjedhjeve të përgjithshme në Hungari, ku kryeministri Viktor Orbán përballet me sfidën më të fortë të sundimit të tij 16-vjeçar nga udhëheqësi i opozitës, Péter Magyar. Lidhjet e ngushta të Hungarisë me Rusinë janë bërë temë kryesore e fushatës, duke shkaktuar tensione brenda BE-së.
Sipas transkripteve, pas telefonatës së vitit 2023, Orbán hoqi dorë nga vetoja dhe lejoi që 26 udhëheqës të BE-së të bien dakord për hapjen e negociatave me Ukrainën, ndërsa Szijjártó mbeti për të ndjekur diskutimet. Një transkript tjetër i datës 2 korrik 2024 tregon se Szijjártó telefonoi sërish Lavrovin për të koordinuar një takim mes Orbán dhe Presidentit rus, Vladimir Putin, gjatë presidencës së rradhës së Hungarisë në Këshillin e BE-së.
Regjistrimet gjithashtu tregojnë se Szijjártó ofroi t’i dërgonte Lavrovit dokumente të BE-së mbi të drejtat gjuhësore të pakicave ukrainase, duke thënë: “Do t’jua dërgoj. Nuk është problem.” Ai reagoi ndaj publikimeve duke i quajtur ato “një ndërhyrje jashtëzakonisht të papërpunuar dhe të hapur të shërbimit sekret” dhe theksoi se Hungaria qëndron për paqen dhe mbron interesat e saj.
Ndërkohë, opozita dhe Komisioni Evropian kanë shprehur shqetësime të forta për veprimet e dyshuara të Szijjártó-s, duke i cilësuar ato si “tradhti të hapur” dhe “thellësisht shqetësuese” për interesat hungareze dhe evropiane.