Shpresat për një ulje të tensioneve mes SHBA-së dhe Iranit kanë sjellë reagime të menjëhershme në tregjet globale, duke shkaktuar rënie të ndjeshme të çmimeve të naftës dhe rritje në bursat ndërkombëtare.
Pas raportimeve se Uashingtoni dhe Teherani janë pranë një marrëveshjeje që mund t’i japë fund përplasjes së fundit në Lindjen e Mesme, kontratat e naftës Brent ranë ndjeshëm gjatë së mërkurës. Çmimi i një fuçie zbriti në rreth 97 dollarë, duke regjistruar rënien më të fortë javore dhe nivelin më të ulët që prej fundit të prillit.
Lëvizja në treg erdhi pasi investitorët interpretuan sinjalet diplomatike si një mundësi për rikthimin e stabilitetit në rajon, sidomos në zonën strategjike të Ngushticës së Hormuzit, ku kalon një pjesë e madhe e furnizimit botëror me naftë dhe gaz.
Edhe bursat europiane reaguan pozitivisht. Indekset kryesore në Londër, Frankfurt dhe Paris shënuan rritje të forta në orët e para të tregtimit, ndërsa edhe Wall Street u hap në territor pozitiv.
Pavarësisht rënies së fundit, çmimi i naftës vijon të mbetet më i lartë krahasuar me periudhën para përshkallëzimit të konfliktit mes SHBA-së, Izraelit dhe Iranit, tensione që prekën zinxhirin global të furnizimit me energji.
Nga Uashingtoni, Sekretari amerikan i Shtetit, Marco Rubio deklaroi se operacionet ushtarake kanë hyrë në një fazë të re dhe se administrata amerikane po fokusohet te arritja e një marrëveshjeje diplomatike. Sipas tij, presidenti amerikan favorizon zgjidhjen përmes dialogut dhe jo përshkallëzimin e konfliktit.