Shtetet e Bashkuara kanë goditur dy cisterna nafte në pronësi të qeverisë iraniane gjatë valës së fundit të sulmeve ndaj Iranit, në një zhvillim që shënon një ndryshim në strategjinë amerikane në Ngushticën e Hormuzit.
Sipas Axios, sulmet u kryen si pjesë e politikës së re “cisternë pas cisterne”, të miratuar nga Presidenti Donald Trump.
Sulmet ndaj cisternave përbëjnë rastin e parë të njohur kur ushtria amerikane ka goditur drejtpërdrejt cisterna iraniane në përgjigje të sulmeve ndaj anijeve në Ngushticën e Hormuzit, dhe jo vetëm në kuadër të zbatimit të bllokadës detare.
Sipas burimeve amerikane të cituara nga Axios, dy cisternat ndodheshin të ankoruara në brigjet e Iranit, në veri të vijës së bllokadës detare amerikane.
Dronët amerikanë goditën dhomat e motorëve të anijeve.
Operacioni ishte pjesë e një vale më të gjerë sulmesh, gjatë së cilës u goditën rreth 100 objektiva në Iran.
Në listën e objektivave përfshiheshin sisteme të mbrojtjes ajrore të Gardës Revolucionare, radarë, kapacitete për vendosjen e minave, qendra komunikimi, lëshues raketash kundër anijeve dhe lëshues dronësh.
Sipas zyrtarëve amerikanë, politika e re synon të pengojë sulmet iraniane ndaj cisternave dhe anijeve që kalojnë në Ngushticën e Hormuzit, një nga rrugët më të rëndësishme detare për transportin e naftës.
Zhvillimi vjen pas përshkallëzimit të përplasjeve në këtë korridor strategjik, ku forcat amerikane kanë kryer edhe sulme ndaj kapaciteteve iraniane të lidhura me radarët, mbrojtjen ajrore dhe vendosjen e minave detare.