SHBA kërkon nga Evropa dhe Kanadaja më shumë përgjegjësi për mbrojtjen e kontinentit

Shtetet e Bashkuara të Amerikës u kanë bërë thirrje aleatëve evropianë dhe Kanadasë që të marrin një rol më të madh në garantimin e mbrojtjes konvencionale të Evropës.

Ambasadori amerikan në NATO, Matthew Whitaker, deklaroi se forcimi i kapaciteteve ushtarake të vendeve evropiane do t’i mundësonte SHBA-së të përqendronte më shumë burime në sfidat strategjike në rajonin e Paqësorit.

“Kjo do të çlirojë SHBA-në për të projektuar fuqinë globalisht dhe për t’u marrë me gjëra të tilla si situatat e Paqësorit me të cilat mund të përballemi në të ardhmen”, tha Whitaker për “Fox Business”.

Sipas tij, Washingtoni kërkon aleatë më të fuqishëm dhe të aftë, te të cilët mund të mbështetet në rast krizash.

Whitaker argumentoi se pas përfundimit të Luftës së Ftohtë dhe shpërbërjes së Bashkimit Sovjetik në vitin 1991, shumë vende evropiane reduktuan ndjeshëm kapacitetet e tyre të mbrojtjes, ndërsa SHBA-ja vazhdoi të mbante një pjesë të konsiderueshme të barrës së sigurisë së kontinentit.

Megjithëse aleatët kanë nisur të rrisin shpenzimet dhe kapacitetet ushtarake, ambasadori amerikan vlerësoi se ky proces duhet të përshpejtohet.

Kjo qasje është pjesë e një riorganizimi më të gjerë të politikës së mbrojtjes amerikane nën administratën e presidentit Donald Trump. Në fokus është zhvendosja graduale e disa burimeve ushtarake nga mbrojtja konvencionale e Evropës drejt përballimit të sfidës strategjike që paraqet Kina.

Sipas kësaj strategjie, vendet evropiane pritet të forcojnë ndjeshëm forcat e tyre konvencionale dhe të jenë në gjendje të përballojnë pjesën kryesore të mbrojtjes së territorit evropian. Ndërkohë, SHBA-ja do të ruajë një rol të rëndësishëm në parandalimin bërthamor dhe në dërgimin e përforcimeve në rast nevoje.

Kërkesa e Washingtonit vjen pas thirrjeve të bëra në shkurt 2025 nga sekretari amerikan i Mbrojtjes, Pete Hegseth, për më shumë përgjegjësi evropiane në sigurinë e kontinentit. Në korrik, Pentagoni nisi gjithashtu një rishikim gjashtëmujor të dislokimit të trupave amerikane në Evropë, me qëllim rivlerësimin e pranisë ushtarake të SHBA-së në kontinent.