SHBA lëshon urdhrin për tarifat doganore me Evropën, ulen ato për automjetet dhe pjesët e këmbimit në 15%

Shtetet e Bashkuara kanë lëshuar një urdhër ekzekutiv në zbatim të Deklaratës së Përbashkët BE-SHBA mbi marrëdhëniet tregtare dhe tarifat doganore.

Komisioneri i Tregtisë i BE-së, Maros Sefcovic, e njoftoi këtë në X. Ai tha se tarifat doganore për automjetet dhe pjesët e këmbimit do të ulen në 15%.

“E mirëpres urdhrin ekzekutiv të SHBA-së si një hap vendimtar në zbatimin e Deklaratës së Përbashkët BE-SHBA. Ai i hap rrugën për uljen e tarifave për makinat dhe pjesët në 15% dhe ofron përjashtime të rëndësishme nga kufiri prej 15%. Duke respektuar së bashku angazhimet tona, ne mund të sjellim përfitime të qëndrueshme për të dyja palët’, tha ai.

Fillimisht, tarifat doganore për makinat fillonin nga 27.5%, me efekt prapaveprues nga 1 gushti 2025. Por ulja aktuale në 15% është pjesë e një marrëveshjeje tregtare midis SHBA-së dhe BE-së të zyrtarizuar në Gusht 2025.

Komisioni Evropian eliminoi tarifat doganore për produktet industriale të importuara amerikane në këmbim të një uljeje të taksave amerikane për makinat dhe pjesët e tyre evropiane.