Pavarësisht kritikave të shumta se ky vendim do të lërë mijëra njerëz pa mundësi për emigrim, qeveria amerikane ka vendosur të bllokojë aplikimet për emigrim nga 19 shtete, duke argumentuar se kjo është një masë për të forcuar kontrollet e sigurisë kombëtare. Ky vendim ka shkaktuar reagime të shumta, por administrata Trump duket se do të vazhdojë me këtë politikë, duke paralajmëruar se lista mund të shtohet dhe të arrijë deri në 30 vende.
“Listën e plotë do ta publikojmë shumë shpejt,” deklaroi një zëdhënës i Departamentit të Sigurisë Kombëtare të SHBA. Ky bllokim është vetëm një hap i fundit i një serie veprimesh që kanë shtuar ndalimet e emigrantëve që nga momenti kur Donald Trump mori detyrën si president. Në këtë rast, bllokimi i aplikimeve për emigrim u argumentua me shqetësimet për sigurinë pas sulmit ndaj anëtarëve të Gardës Kombëtare në Uashington javën e kaluar.
Një shtetas afgan, i dyshuar për lidhje me sulmin, u ndalua dhe këtë ngjarje autoritetet e lidhën me nevojën për të forcuar verifikimin e sigurisë për emigrantët. Sipas politikës së re, të gjithë aplikuesit nga shtetet e prekura do të kalojnë një proces të kujdesshëm verifikimi, për të siguruar se ata nuk përbëjnë një kërcënim për sigurinë kombëtare.
Për momentin, administrata nuk ka specifikuar se sa do të zgjasë pezullimi, as nëse mund të shtohen shtete të tjera në listë. Por autoritetet theksojnë se kjo masë është e nevojshme për të parandaluar “boshllëqet në siguri” dhe për të siguruar integritetin e sistemit të imigrimit amerikan.
Shtetet e prekura nga pezullimi i aplikimeve për emigrim përfshijnë: Afganistanin, Burmën, Çadin, Republikën e Kongos, Guinenë Ekuatoriale, Eritrean, Haiti, Iranin, Libinë, Somalinë, Sudanin dhe Jemenin. Disa nga këto shtete ishin tashmë nën kufizime të pjesshme për udhëtimin, ndërsa për shumicën e qytetarëve të këtyre vendeve, tani janë vendosur ndalime të plota për emigrim, me disa përjashtime të kufizuara.