Një influencere e njohur vietnameze në TikTok, Vo Thi Ngoc Ngan, u arrestua më 13 tetor nën akuzën e prodhimit dhe shitjes së shtesave ushqimore të falsifikuara për humbje peshe dhe produkteve kozmetike që përmbanin substanca të ndaluara, raporton LADbible.
Hetuesit zbuluan se Ngan, nën markën e saj ZuBu Shop, bashkëpunonte që nga viti 2021 me fabrika për të prodhuar kapsula të paautorizuara me përbërës si sibutramina dhe fenolftaleina, të cilat janë të ndaluara në shumë vende për shkak të rreziqeve serioze shëndetësore. Produktet shiteshin me çmime nga 28 deri në 35 euro, duke gjeneruar fitime të konsiderueshme.
Policia njofton se gjatë hetimeve, Ngan kishte dhënë deklarata të shmangshme dhe përpiqej t’ia atribuonte fajin të tjerëve. Produktet e saj, që ajo i promovonte në rrjetet sociale si zgjidhje “magjike” për humbje peshe, mund të shkaktojnë probleme kardiovaskulare, tension të lartë të gjakut, shqetësime tretëse dhe rritje të rrezikut për kancer.
Autoritetet në Ho Chi Minh po zgjasin hetimet për të identifikuar të gjithë të përfshirët në këtë operacion të paligjshëm, ndërsa Ngan do të përballet me akuza për prodhimin dhe tregtimin e produkteve të falsifikuara.