Një ish-infermier në Angli do të kalojë shtatë vitet e ardhshme në burg, pasi drejtësia e shpalli fajtor për abuzimin seksual të një pacienteje që i ishte besuar për trajtim në Royal Bournemouth Hospital.
Ernest Paul Cruz, 38 vjeç, u dënua nga Bournemouth Crown Court për sulm seksual dhe sulm përmes penetrimit. Ngjarja për të cilën ai u shpall fajtor daton në korrik të vitit 2023.
Viktima, një grua në të 30-at, kishte shkuar në spital pasi ishte ndier keq. Pas paraqitjes fillestare në urgjencë, ajo u transferua në një ambient tjetër të spitalit, ku në një moment mbeti vetëm me Cruz, i cili ishte pjesë e stafit që kujdesej për të.
Sipas Policisë së Dorset, ish-infermieri i kërkoi pacientes të ndërronte rrobat dhe e ndihmoi gjatë procesit. Pikërisht në këto rrethana, ai nisi ta prekte seksualisht pa pëlqimin e saj dhe më pas kreu sulmin për të cilin u dënua.
Gruaja nuk heshti për atë që kishte ndodhur. Një ditë më vonë ajo ia tregoi rastin një infermiereje tjetër, duke vënë në lëvizje autoritetet. Policia u njoftua dhe Cruz u arrestua po atë ditë.
Çështja përfundoi në gjykatë, ku viktima dha vetë dëshminë e saj. Pas shqyrtimit të provave, 38-vjeçari u gjet fajtor dhe të hënën iu komunikua dënimi me shtatë vite heqje lirie.
Përveç burgimit, ndaj tij janë vendosur edhe masa të tjera. Cruz është regjistruar si autor i veprave seksuale, i është vendosur një urdhër për parandalimin e dëmit seksual dhe i është ndaluar pa afat kontakti apo afrimi me viktimën.
Detektivi Jordan Hopkins, nga Policia e Dorset, vlerësoi vendimin e gruas për të denoncuar dhe më pas për t’u përballur me procesin gjyqësor. Ai e cilësoi dëshminë e saj si një akt që mund t’u japë kurajë edhe personave të tjerë që kanë përjetuar abuzime seksuale për t’iu drejtuar autoriteteve.
Cruz kishte nisur punën në departamentin e urgjencës së Royal Bournemouth Hospital në vitin 2021. Pas arrestimit në vitin 2023 ai u pezullua nga detyra dhe më vonë iu ndërpre marrëdhënia e punës.
University Hospitals Dorset NHS Foundation Trust ka reaguar gjithashtu pas përfundimit të çështjes. Drejtoresha e infermierisë, Sarah Herbert, i kërkoi falje pacientes dhe familjes së saj për atë që ndodhi ndërsa ajo ishte nën kujdesin e spitalit.
Pas rastit, institucioni ka rishikuar dhe forcuar procedurat që parashikojnë praninë e një anëtari të dytë të stafit gjatë ndërhyrjeve të caktuara me pacientët, me synimin për të rritur sigurinë dhe mbrojtjen e tyre.