Një tërmet i fuqishëm me magnitudë 7.4 të shkallës Rihter ka goditur sot brigjet perëndimore të Meksikës, sipas të dhënave të Shërbimit Gjeologjik të Shteteve të Bashkuara (USGS).

Sipas informacioneve paraprake, epiqendra e tërmetit është regjistruar rreth 71 kilometra në jugperëndim të Puerto Madero, në shtetin Chiapas, ndërsa thellësia fokale është vlerësuar rreth 10 kilometra.

Pas lëkundjeve, Qendra Amerikane e Paralajmërimit për Cunami në Paqësor (PTWC) aktivizoi një paralajmërim për rrezik cunami, duke bërë të ditur se valë mund të preknin zonat bregdetare deri në 300 kilometra larg epiqendrës.

Lëkundjet u ndjenë edhe në vendet fqinje, përfshirë Guatemalën dhe El Salvadorin. Në kryeqytetin e Guatemalës, banorët raportuan lëkundje të forta të ndërtesave, ndërsa disa ambiente u evakuuan si masë sigurie.

Pamje të publikuara në rrjetet sociale tregojnë ndërtesa që lëkunden gjatë momentit të tërmetit, ndërsa autoritetet vijojnë vlerësimin e situatës.

Deri më tani nuk janë raportuar viktima apo dëme të konsiderueshme materiale, ndërsa ekipet e emergjencës dhe institucionet përkatëse po monitorojnë pasojat e mundshme të ngjarjes sizmike.