Një tjetër krizë e rëndë shëndetësore ka goditur Republikën Demokratike të Kongos, pasi autoritetet afrikane të shëndetësisë kanë shpallur zyrtarisht shpërthimin e një epidemie të re të virusit Ebola në provincën lindore Ituri. Sipas njoftimit të bërë nga autoritetet, deri tani janë raportuar rreth 246 raste të dyshuara dhe të konfirmuara, ndërsa të paktën 65 persona kanë humbur jetën si pasojë e virusit vdekjeprurës.
Situata konsiderohet serioze nga ekspertët shëndetësorë, pasi provinca Ituri ndodhet në një zonë të ndjeshme kufitare dhe ekziston rreziku që sëmundja të përhapet edhe në vendet fqinje. Për këtë arsye, autoritetet afrikane kanë nisur përgatitjet për një koordinim ndërkombëtar emergjent me organizata shëndetësore dhe shtete të rajonit, përfshirë Ugandën dhe Sudanin e Jugut.
Sipas specialistëve të shëndetësisë, Ebola është një nga sëmundjet më të rrezikshme infektive në botë dhe përhapet përmes kontaktit të drejtpërdrejtë me gjakun apo lëngjet trupore të personave të infektuar. Simptomat e para zakonisht përfshijnë temperaturë të lartë, lodhje ekstreme, dhimbje koke, dhimbje muskujsh dhe irritim të fytit. Në fazat më të avancuara, pacientët mund të përballen me të vjella të forta, diarre, skuqje në lëkurë dhe gjakderdhje të brendshme apo të jashtme, çka e bën virusin jashtëzakonisht të rrezikshëm dhe shpesh fatal.