Vullkani Kilauea në Ishullin e Madh të Havait ka rifilluar shpërthimet, duke krijuar një spektakël mbresëlënës që ka tërhequr vëmendjen e banorëve dhe turistëve. Pamjet e burimeve të lavës që ngrihen lart dhe ndriçojnë qiellin me shkëlqim të kuq gjatë natës, po bëhen tashmë një atraksion i përditshëm.
Sipas Shërbimit Gjeologjik të SHBA-së, aktiviteti i rritur sizmik dhe rrjedhja e lavës po monitorohen në mënyrë të vazhdueshme, por deri tani shpërthimi mbetet i kufizuar brenda Parkut Kombëtar të Vullkaneve të Havait. Autoritetet theksojnë se nuk ka rrezik për komunitetet e afërta.
Kilauea, një nga vullkanet më aktive në botë, ka shfaqur shpërthime të rregullta që nga fundi i vitit të kaluar, ndërsa shkencëtarët po vazhdojnë vëzhgimet për çdo ndryshim që mund të ndikojë në zonë.