Shtëpia e Bardhë e ka përjashtuar CNN nga udhëtimi me presidentin Donald Trump në Tennessee, ku televizioni ishte planifikuar të mbulonte vizitën e presidentit në emër të rrjeteve kryesore televizive.
Sipas udhëzimeve të shpërndara nga Shtëpia e Bardhë, CNN u hoq nga lista e mediave të caktuara për mbulimin e përbashkët të udhëtimit të Trumpit, i cili pritet të marrë pjesë në një ndeshje futbolli universitar në Knoxville.
Ky mbulim realizohet nga një grup i përbashkët televizionesh, ku rrjetet alternohen për të filmuar dhe raportuar aktivitetet e presidentit në Uashington dhe gjatë udhëtimeve zyrtare.
Fox News, ABC News, CBS News dhe NBC News kishin bojkotuar për pak kohë pjesëmarrjen në këtë grup këtë javë, pasi Trump kishte përjashtuar CNN.
CNN raportoi të premten se ishte planifikuar të udhëtonte me Trumpin në Air Force One të shtunën, për të mbuluar ndeshjen mes Universitetit të Teksasit dhe Universitetit të Tennessee.
Megjithatë, në programin e publikuar më vonë nga Shtëpia e Bardhë, CNN nuk figuroi si pjesë e grupit dhe nuk u njoftua ndonjë rrjet tjetër që do ta zëvendësonte.
Ky është zhvillimi i fundit në përplasjen mes administratës Trump dhe CNN, si dhe disa mediave të tjera, lidhur me aksesin e tyre në Shtëpinë e Bardhë.
Javën e kaluar, Trump kishte ndaluar aksesin e CNN, MS NOW dhe Politico në Shtëpinë e Bardhë.
Të enjten, një gjykatës e bllokoi përkohësisht këtë vendim dhe urdhëroi administratën të rikthente kredencialet e gazetarëve të këtyre mediave për 14 ditë.
Megjithatë, vendimi gjyqësor nuk kërkonte në mënyrë të drejtpërdrejtë që administrata të rikthente CNN në grupin televiziv që mbulon udhëtimet e presidentit.