Qeveria spanjolle miratoi një projektligj të ri kundër pirjes së duhanit në vend, i cili vjen në mes të një përpjekjeje për të kufizuar aksesin e të rinjve në duhan dhe për të përmirësuar shëndetin publik.

Ligji do të zgjerojë hapësirat pa duhan në Spanjë, do t’i japë fund shitjes së cigareve elektronike njëpërdorimshe dhe do të ndalojë reklamat e duhanit. Ai gjithashtu do të ndalojë shprehimisht dyqanet që t’u shesin produkte duhani të miturve dhe do të gjobisë prindërit e tyre nëse kapen duke pirë duhan.

Pirja e duhanit dhe cigareve elektronike do të ndalohen në automjete komerciale, pishina, kampuse universitare, stacione transporti publik dhe tarraca restorantesh dhe baresh, ndër të tjera vende të jashtme.

Sipas ligjit të propozuar, produkte të tilla si cigaret elektronike, produktet bimore dhe pajisjet e ngrohjes së duhanit do të trajtohen në të njëjtën mënyrë si cigaret tradicionale.

Reforma përcakton tre kategori veprash penale. Veprat penale të lehta, të dënueshme me gjoba prej 100 deri në 600 euro, përfshijnë pirjen e duhanit ose përdorimin e cigareve elektronike në vende të ndaluara, mosrespektimin e rregullave në dyqane ose makina shitëse, si dhe konsumimin e duhanit nga të miturit, dënimet e të cilëve do të vendosen drejtpërdrejt mbi prindërit ose kujdestarët e tyre.

Shkeljet serioze, të cilat do të sjellin gjoba midis 601 dhe 10,000 eurove, variojnë nga ngritja e zonave të pirjes së duhanit në hapësira të palejuara deri në grumbullimin e tre gjobave për pirjen e duhanit në vende të ndaluara.

Shkelje të tjera serioze përfshijnë shitjen e cigareve ose paketave të miturve, shpërndarjen e duhanit lirisht dhe lejimin e të miturve për të hyrë në vende ku shiten produkte duhani.

Në nivelin më të lartë janë shkeljet shumë serioze, të dënueshme me gjoba prej 10,000 dhe 600,000 eurosh. Këto përqendrohen në reklamimin, promovimin dhe sponsorizimin e duhanit në të gjitha mediat. I vetmi përjashtim është promovimi në botimet profesionale të industrisë.

Qeveria spanjolle tha se reformat synojnë të përshtatin rregulloret e vendit për duhanin me format e reja të konsumit, të përforcojnë mbrojtjen e shëndetit publik dhe të zvogëlojnë ekspozimin e njerëzve ndaj duhanit, veçanërisht për të rinjtë.

Rreth një e katërta e njerëzve të moshës 15 vjeç e lart në Spanjë pinë duhan, sipas të dhënave të Bashkimit Europian.