Kryeministri britanik Keir Starmer ka dhënë urdhër që forcat e armatosura të Mbretërisë së Bashkuar të ndërmarrin veprime më të ashpra kundër anijeve që i përkasin kësaj që quhet “flotë ruse në hije”.
Kjo përfshin inspektime, hipje në bord dhe madje edhe konfiskimin e tyre brenda ujërave territoriale britanike.
Sipas burimeve qeveritare, Marina Mbretërore dhe forcat speciale do të kryejnë operacione ndaj cisternave që dyshohet se përdoren për të anashkaluar sanksionet perëndimore duke transportuar naftë ruse.
Flota e tillë përbëhet nga anije të vjetra me pronësi të paqartë, që ndryshojnë flamujt dhe kryejnë transferime të fshehta të naftës nga anija në anije. Mendohet se deri në 75% të naftës ruse që shitet ndërkombëtarisht kalon përmes këtij rrjeti.
Vendimi i qeverisë britanike shënon një ndryshim nga monitorimi pasiv i sanksioneve drejt zbatimit aktiv, duke përfshirë konfiskimin e mundshëm të anijeve dhe ndjekje ligjore ndaj kompanive dhe ekuipazheve.
Analistët paralajmërojnë për rreziqe të përshkallëzimit të tensioneve me Moskën, sidomos në zona të ngarkuara si Kanali Anglez.
Qeveria britanike shpjegon se ky hap synon të godasë financiarisht Rusinë dhe të privojë Kremlinin nga fitimet që përdoren për financimin e luftës në Ukrainë.