Studimi ngre alarmin për AI-në e Google/ “Krijon rreziqe të papranueshme për fëmijët”

Një studim i ri ka ngritur shqetësime mbi përdorimin e mjeteve të inteligjencës artificiale të Google nga fëmijët, duke paralajmëruar për rreziqe të mundshme në procesin e të mësuarit dhe sigurinë online.

Organizata “Common Sense Media” ka analizuar disa nga funksionet e inteligjencës artificiale të Google dhe ka vlerësuar se disa prej tyre paraqesin shqetësime të veçanta, veçanërisht për shkak të përdorimit të gjerë të pajisjeve Chromebook në shkolla.

Sipas raportit, një nga problemet kryesore lidhet me përdorimin e AI-së për detyrat e shtëpisë. Studiuesit paralajmërojnë se sistemet e inteligjencës artificiale mund të ofrojnë përgjigje të gatshme, duke penguar procesin e të mësuarit dhe zhvillimin e aftësive të nxënësve.

Gjithashtu, raporti thekson se përgjigjet e dhëna nga AI mund të ndryshojnë në varësi të mënyrës së formulimit të pyetjes, duke krijuar pasiguri për saktësinë dhe besueshmërinë e informacionit.

Një tjetër shqetësim i ngritur lidhet me reagimin e inteligjencës artificiale ndaj situatave të ndjeshme që prekin shëndetin mendor të fëmijëve. Sipas organizatës, sistemi nuk ka arritur gjithmonë të identifikojë shenja të mundshme të krizave emocionale apo situatave problematike.

Raporti vë në dukje gjithashtu se disa funksione si “AI Mode” dhe “AI Overviews” nuk mund të çaktivizohen lehtësisht nga përdoruesit, duke ngritur pikëpyetje mbi kontrollin prindëror dhe sigurinë e përmbajtjes që u shfaqet fëmijëve.

Sipas “Common Sense Media”, mjetet e inteligjencës artificiale të Google kanë marrë vlerësime të dobëta në disa prej kritereve të sigurisë së AI-së të testuara nga organizata, duke rikthyer debatin mbi mbrojtjen e fëmijëve në një epokë ku teknologjia po bëhet gjithnjë e më e pranishme në arsim.