Kryeministri i Hungarisë, Viktor Orban, ka paralajmëruar se vendi i tij do të ndalojë gradualisht furnizimet me gaz natyror për Ukrainën, derisa Kievi të rikthejë rrjedhën e naftës ruse përmes tubacionit Druzhba.
Në një video të publikuar në rrjetet sociale, Orban deklaroi se Ukraina ka bllokuar funksionimin e këtij tubacioni për 30 ditë. “Për sa kohë që Ukraina nuk furnizon naftë, ajo nuk do të marrë gaz nga Hungaria”, u shpreh ai.
Sipas tij, gazi që do të dërgohej në Ukrainë do të ruhet në depozitat hungareze, duke argumentuar se masa është e nevojshme pasi Ukraina “po sulmon gjithashtu tubacionin jugor të gazit”, duke iu referuar linjës TurkStream, që sjell gaz rus në Hungari përmes Turqisë dhe Ballkanit.
Orban theksoi se prioriteti i qeverisë së tij është mbrojtja e sigurisë energjetike të vendit dhe mbajtja e çmimeve të ulëta për qytetarët.
“Ne do të mbrojmë sigurinë energjetike të Hungarisë, çmimin e mbrojtur të karburantit dhe çmimet e reduktuara të gazit”, deklaroi ai, duke shtuar se vendi ka arritur deri tani të përballet me “presionin ukrainas” dhe se qytetarët hungarezë paguajnë ndër çmimet më të ulëta të karburanteve në Evropë.