Një incident i rëndë ka tronditur një qendër sportive në Merthyr Tydfil, në Uellsin Jugor, ku një burrë 82-vjeçar është arrestuar pasi dyshohet se tentoi të rrëmbente një djalë të mitur në ambientet e pishinës publike. Ngjarja u regjistrua në Rhydycar Leisure Centre, kur stafi i qendrës vuri re një sjellje të dyshimtë dhe njoftoi menjëherë policinë. Forcat e rendit mbërritën në vendngjarje dhe ndërhynë për të parandaluar përshkallëzimin e situatës.
I dyshuari, banor i zonës, u arrestua në vend dhe u mor në pyetje nën dyshimet për ndalim të paligjshëm të një fëmije pa pasur asnjë të drejtë ligjore. Fatmirësisht, fëmija nuk pësoi lëndime dhe ndodhet në gjendje të mirë shëndetësore.
Policia e Uellsit Jugor ka bërë me dije se 82-vjeçari është liruar përkohësisht me kusht, ndërsa hetimet për zbardhjen e plotë të rrethanave të ngjarjes vijojnë.